اسلام آباد : چیئرمین پی ٹی آئی عمران خان نے قیوم نیازی کو وزیراعظم آزادکشمیر کیلئے نامزد کردیا ،آزادکشمیر قانون ساز اسمبلی آج نئے وزیراعظم کا اعلان کرے گی۔
تفصیلات کے مطابق وفاقی وزیر اطلاعات فواد چوہدری نے پی ٹی آئی کی جانب سے عبدالقیوم نیازی وزیراعظم آزادکشمیر کے لئے امیدوارنامزد کرنے کی تصدیق کردی۔
فوادچوہدری نے کہا کہ چیئرمین پی ٹی آئی نے قیوم نیازی کو وزیراعظم آزادکشمیر کیلئے نامزد کیاہے، قیوم نیازی متحرک اور حقیقی سیاسی کارکن ہیں، قیوم نیازی کوطویل مشاورت،تجاویز کےجائزےکےبعدنامزدکیاگیا، ان کا دل کارکنوں کےساتھ دھڑکتا ہے۔
تحریک انصاف کے امیدوار عبدالقیوم نیازی کے کاغذات جمع کرادیئے جبکہ متحدہ اپوزیشن کی جانب سے چوہدری لطیف اکبر کے کاغذات نامزدگی اور مسلم لیگ ن آزاد کشمیر کی جانب شاہ غلام قادر نے کاغذات جمع کرائے گئے، آزاد کشمیرقانون سازاسمبلی آج دوپہر2 بجے نئے وزیراعظم کا انتخاب کرے گی۔
خیال رہے قیوم نیازی ن لیگ کے چوہدری یاسین کو شکست دےکرممبر اسمبلی منتخب ہوئے ،عبدالقیوم نیازی 2سال قبل مسلم کانفرنس چھوڑکرپی ٹی آئی میں شامل ہوئے تھے۔
طویل مشاورت اور تجاویز کے جائزے کے بعد وزیر اعظم پاکستان و چیرمین تحریک انصاف عمران خان نے نومنتخب ایم ایل ائے جناب عبدالقیوم نیازی کو وزیر اعظم آزاد کشمیر کے عہدے کیلئے نامزد کیا ہے وہ ایک متحرک اور حقیقی سیاسی کارکن ہیں جن کا دل کارکنوں کے ساتھ دھڑکتا ہے۔
— Ch Fawad Hussain (@fawadchaudhry) August 4, 2021
